பெரமுனவின் தேசிய பட்டியலில் மூன்று முஸ்லிம்கள் மற்றும் தமிழர் ஒருவர் உள்ளடக்கம்! முழு விபரம் இதோ

நடந்து முடிந்த பொதுத்தேர்தலில் 68 இலட்சத்து 53ஆயிரத்து 693 வாக்குகளை பெற்று அமோக வெற்றியீட்டிய ஸ்ரீ லங்கா பொதுஜன பெரமுன தனக்கு கிடைத்த 17 தேசிய பட்டியலுக்கான உறுப்பினர்களின் பெயர் விபரங்களை இன்று சுயாதீன தேர்தல்கள் ஆணைக்குழுவிடம் கையளித்துள்ளது.

ஸ்ரீ லங்கா பொதுஜன பெரமுனவின் செயலாளர் சாகர காரியவசத்தின் கையொப்பத்துடன் இப் பெயர்பட்டியல் கையளிக்கப்பட்டுள்ளது.

அத்துடன் அதில் மூன்று முஸ்லிம்கள். ஒரு தமிழர் பெயரும் உள்ளடக்கப்பட்டுள்ளன.

வடமாகாண முன்னாள் ஆளுநர் கலாநிதி சுரேன் ராகவன் , ஜனாதிபதி சட்டத்தரணி மொஹமட் அலிசப்ரி , முன்னாள் பாராளுமன்ற உறுப்பினர் மொஹமட் முஸம்பில், வர்த்தகர் மொஹமட் பலீல் மர்ஜான் ஆகியோரே அந்த தேசிய பட்டியலில் உள்ள தமிழ் முஸ்லிம்களாவர் . இதனை விட பேராசிரியர் ஜி. எல். பீறிஸ். மத்திய வங்கியின் முன்னாள் ஆளுநர் அஜித் நிவார்ட் கப்ரால், பேராசிரியர் திஸ்ஸ விதாரன, மேல்மாகாண முன்னாள் ஆளுநர் வைத்தியர் சீதா அரம்பேபொல, முன்னாள் பாராளுமன்ற உறுப்பினர் ஜயந்த கெடகொட, பேராசிரியர் சரித ஹேரத் உள்ளிட்டோரும் கட்சியின் செயலாளர் சட்டத்தரணி சாகர காரியவசமும் உள்ளடங்குகின்றனர்.

இந்த தேர்தலில் 59.09 சதவீத வாக்குகளை பெற்று 128 ஆசனங்களை வெற்றிக் கொண்டதன் ஊடாக ஸ்ரீ லங்கா பொதுஜன பெரமுனவுக்கு 17 தேசிய பட்டியல் உறுப்பினர்களை தெரிவு செய்வதற்கான சந்தர்ப்பம் கிடைத்துள்ளது.

அதன்படி சுயாதீன தேர்தல்கள் ஆணைக்குழுவுக்கு ஸ்ரீ லங்கா பொதுஜன பெரமுன அனுப்பி வைத்துள்ள தேசிய பட்டியல் உறுப்பினர்களின் பெயர் விபரம் வருமாறு.

பேராசிரியர் ஜி. எல். பீறிஸ், சட்டத்தரணி சாகரகாரியவசம், மத்திய வங்கியின் முன்னாள் ஆளுநர் அஜித் நிவார்ட் கப்ரால், ஜனாதிபதி சட்டத்தரணி மொஹமட் அலி சப்ரி, ஜனாதிபதி சட்டத்தரணி ஜயந்த வீரசிங்க , ஓய்வுப் பெற்ற ஆசிரிய ஆலோசகர் மஞ்சுளா திஸாநாயக்க, சிரேஸ்ட பேராசிரியர் ரஞ்சித் பண்டார, பேராசிரியர் சரித ஹேரத், சமூக செயற்பாட்டாளர் கெவிந்து குமாரதுங்க, முன்னாள் பாராளுமன்ற உறுப்பினர் மொஹமட் முஸம்பில் பேராசிரியர் திஸ்ஸ விதாரண, பொறியியலாளர் யதாமனிகுணவர்தன, கலாநிதி சுரேன் ராகவன், மவ்பிம, சிலோன் டுடே பத்திரிகை உரிமையாளர், வர்த்தகர் டிரான் அலஸ், விசேட வைத்திய நிபுணர் மேல்மாகாண முன்னாள் ஆளுநர் சீதா அரம்பே பொல,முன்னாள் பாராளுமன்ற உறுப்பினர் ஜயந்த கெடகொட , வர்த்தகர் மொஹமட் பலிலீல் மர்ஜான் ஆகியோர் அந்த ப்பட்டியலில் உள்ளடக்கப்பட்டுள்ளனர்.